ՌԴ-ից կճշտեն արտերկրում բնակվող իրենց քաղաքացիների կարգավիճակը
Ռուսաստանում քննարկվում է արտերկրում բնակվող ՌԴ քաղաքացիների պարտադիր հյուպատոսական հաշվառման ներդրման հարցը։ Այս մասին ՌԻԱ Նովոստիին հայտնել են Ռուսաստանի ԱԳՆ-ից։
Գերատեսչության պաշտոնական ներկայացուցիչ Մարիա Զախարովայի խոսքով՝ ԱԳՆ-ում նախատեսում են ձևակերպել «Ռուսաստանի Դաշնության սահմաններից դուրս մշտապես բնակվող քաղաքացի» հասկացության կայուն սահմանումը: Դրանով հնարավոր կլինի կոնկրետացնել նման քաղաքացիների իրավական կարգավիճակը։
Գերատեսչությունը նախատեսում է մինչեւ 2025 թվականը կառավարությանը ներկայացնել արտասահմանում մշտապես բնակվող ռուսաստանցիների մասին զեկույց, եզրակացրել են նախարարությունում:
Զախարովան նաև հայտարարել է, որ արտերկրում ռուսական հյուպատոսությունները չեն հավաքում մեկնած ռուսների կենսաչափական տվյալները: Նրա խոսքով՝ արտերկիր մեկնած ՌԴ քաղաքացիների հյուպատոսական հաշվառման կանգնելն այժմ ծանուցման բնույթ է կրում։ Այն իրականացվում է բացառապես քաղաքացու կամ նրա օրինական ներկայացուցչի նախաձեռնությամբ, այդ թվում՝ հեռավար ռեժիմով։
