Երեք երկիր ռազմական տեխնիկայի տեղափոխման համար միջանցք կստեղծեն

Նիդեռլանդները, Գերմանիան և Լեհաստանը զորքերի և ռազմական տեխնիկայի տեղափոխման համար ռազմական միջանցք ստեղծելու մասին հռչակագիր են ստորագրել, հայտարարել է Նիդեռլանդների պաշտպանության նախարար Կաիսա Օլոնգրենը: Տեղեկությունը փոխանցում է ՌԻԱ Նովոստին։ 

«Մեզ անհրաժեշտ է «ռազմական Շենգեն», որպեսզի ավելի արագ և արդյունավետ տեղափոխենք ռազմական անձնակազմն ու տեխնիկան։ Դա ավելի ուժեղ կդարձնի Եվրոպան։ Լեհաստանը, Գերմանիան և Նիդեռլանդները հռչակագիր են ստորագրել ռազմական միջանցք ստեղծելու մասին»,- գրել է Օլոնգրենը X սոցիալական ցանցում:

Ավելի վաղ ՆԱՏՕ-ի թիկունքային ապահովման եւ լոգիստիկայի միացյալ հրամանատարության ղեկավար Ալեքսանդր Զոլֆրանկը ԶԼՄ-ներին տված հարցազրույցում հայտարարել էր «ռազմական Շենգեն» ստեղծելու ցանկության մասին, որի շրջանակներում դաշինքի երկրների զորքերը կկարողանան ազատ տեղաշարժվել:

Ներկա պահին ՆԱՏՕ-ի ուժերը բախվում են խոչընդոտների՝ մի շարք ազգային կանոնակարգերի տեսքով մարդկանց և զինամթերքի տեղափոխման ժամանակ։ ՆԱՏՕ-ի պաշտոնյան հավելել է, որ անհրաժեշտ է նախապես «նախապատրաստել հնարավոր ռազմական գործողությունների թատրոնը» հավաքական պաշտպանության մասին ՆԱՏՕ-ի կանոնադրության հինգերորդ հոդվածի հնարավոր կիրառման դեպքում: Միևնույն ժամանակ, Ռուսաստանի նախագահի մամուլի քարտուղար Դմիտրի Պեսկովը, մեկնաբանելով այդ հայտարարությունները, ընդգծել է, որ Եվրոպայում չեն ցանկանում լսել Ռուսաստանի մտահոգությունները անվտանգության վերաբերյալ և անտեսում են անվտանգության անբաժանելիության սկզբունքը: