ԱՄՆ-ը պետք է հարվածի Իրանի ներսում գտնվող կարևոր թիրախներին․ սենատոր
ԱՄՆ-ը պետք է հրթիռային հարված հասցնի Իրանին՝ Մերձավոր Արևելքում իր բազաներից մեկի վրա հարձակվելու համար։ Այս մասին X սոցիալական ցանցում գրել է Հարավային Կարոլինայից սենատոր Լինդսի Գրեհեմը: Նրա կարծիքո ՝ դա ապագայում կկանխի նման միջադեպերը։
«Բայդենի վարչակազմը կարող է ոչնչացնել բոլոր իրանական վստահված անձանց, որոնց ցանկանում է, սակայն դա չի զսպի իրանական ագրեսիան։ Ես կոչ եմ անում վարչակազմին հարվածներ հասցնել Իրանի ներսում կարևոր օբյեկտներին ոչ միայն որպես հատուցում մեր զինվորների սպանության համար, այլև ապագա ագրեսիան զսպելու նպատակով»,- հայտարարել է Գրեհեմը։
Սենատորը վստահություն է հայտնել, որ Իրանի կառավարությունը «արձագանքում է միայն ուժային մեթոդներին»: Նա ընդգծել է, որ քանի դեռ Իրանը չի բախվել իր ենթակառուցվածքների և զինծառայողների համար իրական հետևանքների հետ, ամերիկյան զորքերի վրա հարձակումները կշարունակվեն: Գրեհեմը նաև քննադատել է ԱՄՆ պաշտպանության նախարար Լլոյդ Օսթինին՝ նշելով տարածաշրջանում ամերիկյան ուժերի դեմ ագրեսիան զսպելու նրա ջանքերի ձախողումը:
Հիշեցնենք, որ մի քանի ամերիկացի զինծառայողներ տարբեր վնասվածքներ են ստացել Իրաքի արևմուտքում գտնվող ԱՄՆ Այն ալ Ասադ ռազմակայանի գնդակոծության հետևանքով: Պենտագոնի տվյալներով՝ Իրանի աջակցությամբ զինյալները մի քանի բալիստիկ հրթիռ են արձակել բազայի ուղղությամբ։ Արկերի մեծ մասը որսացել են ՀՕՊ համակարգերը, սակայն որոշները, այնուամենայնիվ, հասել են իրենց նպատակին։
