Առաջիկա 10 հազար տարում գոյության հնարավորություն ունե՞նք. Պուտին
Ռուսաստանի և Բելառուսի նախագահների մասնակցությամբ Անտարկտիդայում ռուսաստանյան «Վոստոկ» կայանի նոր ձմեռային համալիրի գործարկման արարողության ժամանակ տեսակոնֆերանսի ժամանակ ՌԴ նախագահ Վլադիմիր Պուտինը հարցրել է, թե արդյոք մարդկությունը առաջիկա 10 հազար տարում գոյություն ունենալու հնարավորություն ունի։
Իր ելույթի ժամանակ Պուտինը նշել է, որ սառցադաշտերի խորը հորատման եզակի տեխնոլոգիաները, որոնք մշակվել են դեռևս 70-ականներին, տեղեկատվություն են տվել, որ վերջին 420 հազար տարվա ընթացքում 4 ամբողջական կլիմայական ցիկլեր են եղել տաքացումից մինչև սառցակալում։
Բելառուսի նախագահ Ալեքսանդր Լուկաշենկոն էլ հետաքրքրվել է, թե ինչ ժամանակաշրջանում է գտնվում մարդկությունը։
«Հետաքրքիր կլիներ իմանալ, թե ինչ ժամանակաշրջանում և ինչ կետում ենք գտնվում և որ պահինայդ սառցակալումը կամ տաքացումը վրա կհասնի... Ես շատ եմ ուզում, որ ոչ միայն մենք, այլև մոլորակը գոյություն ունենա»,- հույս է հայտնել Բելառուսի նախագահը։
Իր հերթին Պուտինը հետաքրքրվել է․ «Արդյո՞ք, մարդկությունը առաջիկա 10 հազար տարում գոյություն ունենալու հնարավորություն ունի»:
Երկու երկրների ղեկավարներին հանգստացրել է Ռուսաստանի բնական պաշարների և շրջակա միջավայրի նախարար Ալեքսանդր Կոզլովը։
«Մենք միջսառցադաշտային ժամանակաշրջանում ենք, և դա երաշխավորում է 20 հազար տարվա ջերմություն։ Մենք արդեն անցել ենք 10 հազարը, դեռ 10 հազար տարվա ջերմություն ունենք երաշխավորված»,- ասել է նա։
«Դա նորմալ է, ամեն ինչ լավ է»,- արձագանքել է ՌԴ նախագահը։
