Հայտնի է, թե որ երկրից են կոտրել Վրաստանի նախագահի պաշտոնական կայքը

Վրաստանի պետական ​​անվտանգության ծառայությունը պարզում է երկրի նախագահի կայքի վրա հաքերային հարձակմանն առնչություն ունեցած անձանց ինքնությունը, հաղորդում է «Newsgeorgia»-ն։

Պետական ​​անվտանգության ծառայությունը հայտնել է, որ հաջողվել է «կարճ ժամանակում» հայտնաբերել և կանխել կիբերհարձակումը։

Այդուհանդերձ, չի հաղորդվում, թե որ երկրից է կատարվել կիբերհարձակումը։

Հունվարի 26-ին Վրաստանի նախագահ Սալոմե Զուրաբիշվիլիի պաշտոնական «president.ge» կայքը մի քանի ժամով անհասանելի էր։ Գլխավոր էջի փոխարեն հաքերները տեղադրել էին ոսկորների և գանգի պատկեր՝ «Hacked by Cozy Bear Slava Russia» (հաքերային հարձակումը՝ «Cozy Bear»-ի, փա՛ռք Ռուսաստանին) գրությամբ։

«Сozy Bear»-ը ռուսական հաքերային խումբ է, որը, ըստ արևմտյան հետախուզական ծառայությունների, գործում է Ռուսաստանի Դաշնության ԱԴԾ հովանու ներքո։ Այն հիշատակվել է 2008 թվականին ԱՄՆ նախագահի թեկնածու Բարաք Օբամայի շտաբի, ԱՄՆ ֆինանսների, առևտրի նախարարությունների և բազմաթիվ այլ պետական ​​կառույցների վրա կատարված կիբերհարձակումների կապակցությամբ։

Վերջին 24 ժամվա ընթացքում կիբերհարձակումների են ենթարկվել նաև վրացական ընդդիմադիր «Ֆորմուլա» և «Մտավարի» հեռուստաալիքների կայքերը։