Թուրքիայի անվտանգությունը մեր անվտանգությունն է, տարածաշրջանը պետք է համագործակցի․ Ռաիսի

Իրանի և Թուրքիայի նախագահներ Իբրահիմ Ռաիսին և Թայիփ Էրդողանը երկկողմ ձևաչափով հանդիպումից հետո հանդես են եկել հայտարարություններով։

Իրանական ԶԼՄ-ների փոխանցմամբ՝ Էրդողանը դատապարտել է Քերմանի ահաբեկչությունը՝ նշելով, որ աջակցում են Իրանին ահաբեկչության դեմ պայքարում․ «Իբրահիմ Ռեյսիի հետ մեր հանդիպմանը քննարկել ենք տարածաշրջանային և միջազգային խնդիրները, հատկապես՝ իսրայելական հարձակումները։ Շարունակելու ենք զարգացնել Իրանի հետ մեր հարաբերությունները՝ մեր երկրների և մեր տարածաշրջանի շահերին համապատասխան»,- ասել է Էրդողանը։

Իրանի նախագահ Իբրահիմ Ռաիսին էլ իր հերթին ասել է․ «Մենք և Թուրքիան, որպես երկու մեծ և հզոր երկրներ, մեր համագործակցությամբ կարող ենք լուծել տարածաշրջանային և գլոբալ բազմաթիվ խնդիրներ։

Թուրքիայի անվտանգությունը մեր անվտանգությունն է։ Սիոնիստները ցանկանում են պառակտել տարածաշրջանի երկրներին, դրան դիմակայելու ճանապարհը տարածաշրջանային համագործակցությունն է»։

Ռաիսիի խոսքով՝ ՄԱԿ-ը կորցրել է իր գործառույթը։