Դրական առումով զարգացում կա. Ալեն Սիմոնյանը` խաղաղության պայմանագրի մասին
Խաղաղության պայմանագրում չկա մեկ թեզ, որը վերաբերում է միայն մեկ կողմին՝ Հայաստանին կամ Ադրբեջանին։ Պայմանագրում առկա բոլոր թեզերը վերաբերում են երկու կողմերին էլ։ Այս մասին ԱԺ-ում լրագրողների հետ ճեպազրույցում ասաց ԱԺ նախագահ Ալեն Սիմոնյանը՝ դարձյալ պնդելով, որ թե խաղաղության պայմանագրում չկա որևէ կետ, որով ՀՀ-ն միակողմանի պարտավորվում է։
Նա նշեց, որ ոչ մի կտրուկ փոփոխություն տեղի չի ունեցել, բանակցային փոխանակումը շարունակվում է։ Ավելին, ըստ նրա, դրական առումով զարգացում կա. ԱԺ նախագահի խոսքով՝ կա քննարկվող պայմանագիր, որի կետերով մենք առաջ ենք գնում այս պահի դրությամբ։
««Զանգեզուրի միջանցքի» մասին կետ պայմանագրում չկա ու չի կարող լինել»,-պնդեց Ալեն Սիմոնյանը։
Հարցին, թե Ադրբեջանը չի ճանաչում ՀՀ տարածքային ամբողջականությունը՝ Ալեն Սիմոնյանը չհամաձայնեց.
«Ադրբեջանի նախագահը ՀՀ տարածքային ամբողջականության մասին բազմիցս հայտարարություն է արել, նաև ՌԴ նախագահի ներկայությամբ, հարցազրույցների ժամանակ, այո՛, բառացի 29,800 քկմ-ի մասին չի խոսել, բայց մենք սպասում ենք, որ դա նույնպես տեղի կունենա, որը կհստակեցվի սահմանագծման առումով և գուցե դա է պատճառը, որ զերծ են մնում կոնկրետ թիվ հայտարարելուց, միգուցե պահում են հետագա սակարկման համար»,-կարծիք հայտնեց Սիմոնյանը։
Ալեն Սիմոնյանը չբացառեց Հայաստան- Ադրբեջան ուղիղ բանակցությունները՝ մատնանշելով, որ հենց ուղիղ բանակցությունների միջոցով Հայաստան վերադարձավ գերիների մի խումբ։
