Իսրայելի ԱԳ նախարարը Էրդողանին հիշեցրել է Հայոց ցեղասպանության մասին
Գազայի հատվածում ռազմական գործողության լույսի ներքո Իսրայելի դեմ Թուրքիայի կշտամբանքները հիմք չունեն, Անկարան պետք է հիշի հայերի և քրդերի ճակատագիրը։ Այս մասին հայտարարել Է հրեական պետության ԱԳ նախարար Իսրայել Կացը՝ Թուրքիայի նախագահ Ռեջեփ Թայիփ Էրդողանի՝ Իսրայելի հասցեին հնչեցրած քննադատական արտահայտություններից հետո։ Տեղեկությունը փոխանցում է ՏԱՍՍ-ը։
«Թուրքիայի նախագահ Թայիփ Էրդողանն իր անցյալում Հայոց ցեղասպանություն ունեցող երկրից այժմ պարծենում է Իսրայելի հասցեին անհիմն մեղադրանքներով։ Մենք հիշում ենք հայերին, քրդերին։ Ձեր պատմությունն ինքնին խոսում է: Իսրայելը պաշտպանվում է, այլ ոչ թե ոչնչացնում՝ հանդես գալով Ձեր բարբարոս դաշնակիցների դեմ»,- գրել է Կացը X-ի իր էջում ։
Ավելի վաղ Էրդողանը հույս էր հայտնել, որ Իսրայելը կդատապարտվի ՄԱԿ-ի Միջազգային դատարանի կողմից Գազայի հատվածում իր գործողությունների համար, որոնք, ըստ թուրք առաջնորդի, ռազմական հանցագործությունների հատկանիշներ ունեն:
Հաագայի ՄԱԿ-ի միջազգային դատարան Իսրայելի դեմ հայց է ներկայացվել ՀԱՀ-ի իշխանությունների կողմից՝ կապված Իսրայելի կողմից Ցեղասպանության հանցագործությունը կանխարգելելու և պատժելու մասին կոնվենցիայի հնարավոր խախտման հետ: Փաստաթղթում նշվում է, որ Իսրայելի գործողությունները Գազայի հատվածում կարելի է որակել որպես ցեղասպանություն, քանի որ դրանք իրականացվում են «Գազայում պաղեստինցիներին ոչնչացնելու կոնկրետ մտադրությամբ՝ որպես ավելի լայն Պաղեստինյան ազգային, ռասայական եւ էթնիկ խմբի մաս»: Այս հայցի շրջանակներում Հարավաֆրիկյան կողմը ձգտում է, որպեսզի դատարանը որոշի, որ Իսրայելը խախտում է կոնվենցիայով ստանձնած իր պարտավորությունները և պետք է դադարեցնի բոլոր ռազմական գործողությունները Գազայի հատվածում, ինչպես նաև հատուցումներ վճարի:
Իսրայելական կողմը հերքել է այդ մեղադրանքները՝ Հարավային Աֆրիկայի դիրքորոշումը կեղծավոր անվանելով, և խնդրել է լսումների ժամանակ հանել այդ գործը քննությունից։ Կացը դատական լսումների արդյունքում կարծիք է հայտնել, որ ՀԱՀ-ն ինքն է խախտում ցեղասպանության մասին կոնվենցիան՝ աջակցելով պաղեստինյան ՀԱՄԱՍ արմատական շարժմանը, որն Իսրայելում համարվում է ահաբեկչական կազմակերպություն և որի դեմ Գազայում ռազմական գործողություն է իրականացվում:
Նշենք, որ Իսրայելը չի ճանաչել Հայոց ցեղասպանությունը։
