Ինչու է Լոնդոնը հարվածներ հասցրել Եմենին․ Բրիտանիայի ԱԳՆ-ն բացատրում է
Մեծ Բրիտանիան մասնակցել է Եմենի հյուսիսում և կենտրոնական մասում իշխող «Անսար Ալլա» (հուսիթներ) շարժման օբյեկտներին ԱՄՆ-ի հետ համատեղ հարվածներ հասցնելուն՝ նպատակ ունենալով ապահովել իր նավերի անվտանգությունն ու նավարկության ազատությունը Կարմիր ծովում: Այս մասին X սոցցանցի իր էջում հայտնել է Մեծ Բրիտանիայի արտաքին գործերի նախարար Դեւիդ Քեմերոնը։
«Բրիտանական նավերի անվտանգությունը և Կարմիր ծովով նավարկության ազատությունը առաջնային նշանակություն ունեն, ուստի մենք գործում ենք»,- գրել է նա:
Մինչ այդ Եմենի հյուսիսում և կենտրոնական մասում իշխող հուսիների «Անսար Ալլա» շիական շարժման բարձրագույն քաղաքական խորհրդի անդամ Մուհամեդ Ալի Ալ Հուսին հայտարարել էր, որ Եմենի ուղղությամբ Վաշինգտոնի և Լոնդոնի հարվածները դարձել են «ահաբեկչական բարբարոսություն և կանխամտածված ագրեսիա»:
Ավելի վաղ ԱՄՆ-ն Իրանին մեղադրել էր Կարմիր ծովում առևտրային նավերի վրա հութիների գրոհներ նախապատրաստելու մեջ:
