Լավրովը կանխատեսել է՝ ինչպիսին կլինի Ուկրաինայում և Մերձավոր Արևելքում հակամարտությունների ավարտը

Արդարությունը կհաղթի ինչպես Ուկրաինայում, այնպես էլ Մերձավոր Արևելքում։ Այս մասին հայտարարել է Ռուսաստանի արտգործնախարար Սերգեյ Լավրովը։ Տեղեկությունը փոխանցում է ՏԱՍՍ-ը։

Լավրովը նշել է, որ Ուկրաինայի և Մերձավոր Արևելքի դեպքում միտում է նկատվում, երբ Միացյալ Նահանգները մոնոպոլիզացնում է արտաքին քաղաքական գործընթացները, ինչի արդյունքում դրանք ավերածություններ են բերում: ՌԴ ԱԳ նախարարը հիշել է Լիբիայի հետ կապված իրավիճակը, երբ ամերիկյան գործողությունների արդյունքում քաղաքացիական անձանց կորուստները հազարավոր էին, ինչից հետո երկրում սոցիալ-տնտեսական անկում է գրանցվել:

«Եվ այնտեղ, և այնտեղ, մենք համոզված ենք, որ արդարությունը կհաղթանակի»,- հայտարարել Է Լավրովը:

Այսօր եվրոպական դիվանագիտության ղեկավար Ժոզեպ Բորելը հայտարարել էր, որ Եվրամիությունը կարող է «անդառնալիորեն փչանալ», եթե Ռուսաստանը հաղթի Ուկրաինայի հակամարտությունում և շարունակի հակամարտությունը Գազայի հատվածում: