Սկանդալ Դեպարդիեի շուրջ․ ինչու են Փարիզի թանգարանից հանել դերասանի մոմե արձանը
Փարիզի մոմե արձանների թանգարանը ցուցասրահից հեռացրել է դերասան Ժերար Դեպարդիեի մոմե արձանը՝ այցելուների բացասական արձագանքից հետո: Այս մասին այսօր հայտնել Է France-Presse գործակալությունը՝ վկայակոչելով թանգարանի տնօրինությանը։
Թանգարանում պարզաբանել են, որ այն բանից հետո, երբ դերասանը հայտնվել է ԶԼՄ-ների տեսադաշտում՝ կապված սկանդալային իրավիճակի հետ, թանգարանի այցելուները սկսել են նրա մասին բացասական մեկնաբանություններ թողնել։
Մինչ այդ՝ դեկտեմբերի 14-ին, հայտնի էր դարձել, որ ֆրանսիացի դերասանուհի Էմանուել Դեբևերը, ով Դեպարդիեին մեղադրել էր սեռական բռնության մեջ, ինքնասպան է եղել: Փարիզի դատախազությունը որոշել է հետաքննություն սկսել մահվան հավանական պատճառների վերաբերյալ։ Իր կենդանության օրոք Դեբևերը հրապարակավ հայտարարել է, որ դերասանն իրեն ոտնձգություններ է թույլ տվել հենց կադրում։
Հաջորդ օրը Ֆրանսիայի մշակույթի նախարար Ռիմա Աբդուլ-Մալաքը հայտարարել է, որ Դեպարդիեն խայտառակում է Ֆրանսիան իր պահվածքով: Նրա կարծիքով՝ երկրի վրա խայտառակություն են առաջացնում արտիստի սեքսիստական արտահայտությունները կանանց մասին։ Նա նաև հավելել է, որ կարգապահական ընթացակարգը մտադիր է դերասանին զրկել Պատվո լեգեոնի շքանշանից: Դեկտեմբերի 16-ից հետո Դեպարդիեն իր պարգեւը հանձնել Է գերատեսչության տնօրինությանը։
74-ամյա դերասանին առաջին անգամ սեռական բռնության մեջ մեղադրել են դեռ ապրիլին։ Այն ժամանակ Դեպարդիեի անպարկեշտ պահվածքի մասին հայտարարել էին միանգամից 13 կին, դերասանուհիներ, հավելյալներ եւ դիմահարդարներ։
