«Մաղթում ենք ՀՀ-ի և Ադրբեջանի միջև խաղաղության պայմանագրի շուտափույթ ստորագրում». Թուրքիայի ԱԳՆ
Թուրքիայի արտաքին գործերի նախարարությունը (ԱԳՆ) ողջունում է Հայաստանի վարչապետի գրասենյակի և Ադրբեջանի նախագահի վարչակազմի համատեղ հայտարարությունը, որում աջակցություն է հայտնում «լրացուցիչ քայլեր ձեռնարկելու շուրջ քննարկումները շարունակելուն»։ Այս մասին ասվում է Թուրքիայի ԱԳՆ հայտարարության մեջ։
«Մենք ողջունում ենք երկու երկրների միջև վստահության ամրապնդմանն ուղղված որոշ կոնկրետ քայլեր ձեռնարկելու որոշումը, որը հայտարարվել է Հայաստանի վարչապետի գրասենյակի և Ադրբեջանի նախագահի վարչակազմի համատեղ հայտարարության մեջ և սատարում ենք լրացուցիչ քննարկումները շարունակելու որոշումը։
Մաղթում ենք Հայաստանի և Ադրբեջանի միջև խաղաղության պայմանագրի շուտափույթ ստորագրում, որը կդառնա Հարավային Կովկասում մշտական խաղաղության և կայունության հաստատման գործընթացի կարևոր իրադարձություններից մեկը»,- ասված է հայտարարության մեջ։
