ԱՄՆ նախագահ Ջո Բայդենի որդին կարող է կանգնել դատարանի առաջ
ԱՄՆ նախագահի որդին՝ գործարար Հանթեր Բայդենը, մեղադրվում է հարկերից խուսափելու մեջ, ասվում է Կալիֆոռնիայի մեծ ժյուրիի եզրակացության մեջ։
Դատախազները պնդում են, որ Բայդենը չի վճարել 1,4 միլիոն դոլարի հարկեր առնվազն հինգ տարի՝ 2016-ից մինչև 2020 թվականը, ինչպես նաև կեղծ հաշվետվություններ է ներկայացրել:
«2016 թվականից մինչև 2020 թվականի հոկտեմբերի 15-ն ընկած ժամանակահատվածում ամբաստանյալը ծախսել է այս գումարը թմրանյութերի, ուղեկցորդների և ընկերուհիների, շքեղ հյուրանոցների և վարձակալության օբյեկտների, էկզոտիկ մեքենաների, հագուստի և այլ անձնական իրերի վրա, ընդհանրապես՝ ամեն ինչ, բացի հարկերից»,- ընդգծել են ժյուրիի անդամները։
Ընդհանուր առմամբ, մեղադրական եզրակացությունը բաղկացած է ինը կետից։
Ինչպես պարզաբանել է CNN-ը, հատուկ դատախազ Դեյվիդ Վայսը վերջին շաբաթների ընթացքում ցուցմունքներ և ապացույցներ է հավաքում Հանթեր Բայդենի դեմ քրեական մեղադրանքների հետ կապված։ Օգոստոսին նա ասել էր, որ գործարարը կարող է կանգնել դատարանի առաջ:
