Նախատեսվում է ավելացնել Իրանից գազի ներկրումը
Հայաստանը նախատեսում է ավելացնել Իրանից ներկրվող գազի ծավալները։ Այս մասին ասաց ՀՀ տարածքային կառավարման և ենթակառուցվածքների նախարար Գնել Սանոսյանը՝ «Էներգետիկ շաբաթ 2023» միջոցառման ժամանակ։
«Հայաստանը ներկայում տարեկան 365 մլն խմ գազ է ներկրում Իրանից, հայտնի պայմանագրի հիման վրա 1։3 հարաբերակցությամբ էլեկտրաէներգիա ենք վերադարձնում Իրան։ Մի քանի ամիս առաջ մեր գործընկերների հետ կնքել ենք այդ համաձայնագիրը մինչև 2030 թվական երկարաձգելու փատաթուղթը, որը հնարավորություն է տալիս նաև մեծացնել Իրանից գազի ներկրումը ՀՀ և համապատասխան էլեկտաէներգիայի արտահանումը»,–նշեց նախարարը։
Սանոսյանի խոսքով՝ Իրանից ներկրվող գազի գործող խողովակի տրամագիծը թույլ է տալիս, որ ավելի շատ գազ ներկրվի։
«Նորի կարիք դեռ չկա, քանի որ ներկայիս խողովակաշարն ամբողջ հզորությամբ չի օգտագործվում»,- հավելեց նա։
Նշենք, որ «հայտնի պայմանագիր» ասելով Սանոսյանը նկատի ունի «Գազ էլեկտրաէներգիայի դիմաց» համաձայնությունը, որի ժամկետն ավարտվում էր 2026թվականին, սակայն երկարաձգվեց մինչև 2030-ը։
