2023 թ. նոյեմբերին 12–ամսյա գնաճը նվազել է -0.5 տոկոսով։ Այս մասին լրագրողների հետ հանդիպմանն ասաց ՀՀ կենտրոնական բանկի նախագահ Մարտին Գալստյանը։ 

Նրա խոսքով` 12-ամսյա բնականոն գնաճը հոկտեմբերի վերջին կազմել է զրո։ Գալստյանը նշեց` 12–ամսյա գնաճը կկայունանա 4 տոկոս ցուցանիշի սահմանում։

«Նախանշված ուղեգծից գնաճի շեղման ռիսկերը հավասարակշռված են»,– ասաց նա։

Ըստ Գալստյանի` ՀՀ–ում պահպանվում է բարձր տնտեսական ակտիվություն, որին նպաստում են ծառայությունների ու շինարարության բարձր աճը։

«2023 թ. 4–րդ եռամսյակում համաշխարհային և ՀՀ հիմնական գործընկեր երկրների տնտեսական ակտիվությունը շարունակում է դանդաղել։ Դա արտահայտվում է ապրանքահումքային շուկաներում գների և համաշխարհային գնաճի տեմպերի նվազմամբ։ Արտաքին հատվածից ՀՀ տնտեսության վրա ակնկալվում են գնանկումային ազդեցություններ»,– մանրամասնեց ԿԲ նախագահը: 

Նրա խոսքով` արտաքին պահանջարկը ՀՀ–ում դանդաղում է, իսկ ներքին պահանջարկը շարունակում է մնալ բարձր, որն արտահայտվում է մասնավոր սպառման բարձր աճով։