Եվս մեկ անգամ ես կոչ եմ անում Հայաստանին. Էրդողան
Թուրքիայի նախագահ Ռեջեփ Թայիփ Էրդողանը Հայաստանին «կոչ է անում» որքան հնարավոր է շուտ խաղաղության պայմանագիր կնքել Ադրբեջանի հետ։ Այս մասին հայտնում է ТАСС–ը:
«Եվս մեկ անգամ ես կոչ եմ անում Հայաստանին բռնել մեր ադրբեջանցի եղբայրների կողմից իրեն ուղղված բարեկամության ձեռքը», - ասել է Թուրքիայի ղեկավարը կառավարության նիստից հետո: Վերջինիս խոսքը հեռարձակվել է TRT Haber հեռուստաալիքով:
Ըստ Էրդողանի, ղարաբաղյան հակամարտության կարգավորումը «նոր դարաշրջան բացեց տարածաշրջանում», սակայն Արևմուտքում որոշ ուժեր չեն ցանկանում համակերպվել դրա հետ։ «Հայաստանի ժողովուրդը և նրա ղեկավարությունը պետք է խաղաղության և համագործակցության մեջ փնտրեն անվտանգություն, այլ ոչ թե տարածաշրջանից հազարավոր կիլոմետրեր հեռու: Արևմտյան երկրների կողմից ուղարկված ոչ մի զենք և զինամթերք չի կարող ապահովել կայուն խաղաղության և անվտանգության միջավայր», - ասել է Էրդողանը` չնշելով, թե որ պետությունների մասին է խոսքը:
Նոյեմբերի 20-ին Ադրբեջանի նախագահ Իլհամ Ալիևը հայտարարեց, որ Բաքուն ավելի քան երկու ամիս է՝ սպասում է Հայաստանի պատասխանին խաղաղության պայմանագրի առաջարկներին։ Նրա խոսքով, Երևանի պատասխանը ուշացնելու պատճառն այն է, որ «վատ խորհուրդներ են ստանում, մասնավորապես Ֆրանսիայից»։ «Ֆրանսիան շատ կործանարար դեր է խաղում Հարավային Կովկասում, փաստորեն, Հայաստանը դարձել է ֆրանսիական կառավարության խամաճիկը, և դա կարող է լուրջ սպառնալիք դառնալ տարածաշրջանային կայունության համար»,- զգուշացրել է Ալիևը։
