Արմավիրում ուժգին քամուց տան տանիքի ծածկը պոկվել և ընկել է մեքենայի վրա
Փրկարարները տանիքի ծածկը հեռացրել են ավտոմեքենայի վրայից: Այս մասին հայտնում է ՀՀ ՆԳՆ Փրկարար ծառայությունը:
Նշվում է, որ դեպքի մասին ահազանգը ստացվել է այսօր՝ ժամը 18։22-ին: Ըստ հաղորդագրության՝ Արմավիրի մարզի Արմավիր քաղաքի Սայաթ-Նովա փողոցի
3-րդ նրբանցքի տներից մեկի տանիքի ծածկը քամուց պոկվել և ընկել է կայանած ավտոմեքենայի
վրա։
«Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ: Պարզվել է, որ տան պատշգամբի տանիքի մետաղյա ծածկը (մոտ 32 քմ) քամուց պոկվել և ընկել է բակում կայանած «Ford» մակնիշի ավտոմեքենայի վրա. տուժածներ չկան: Փրկարարները տանիքի ծածկը հեռացրել են ավտոմեքենայի վրայից»,– նշվում է հաղորդագրության մեջ։
