Ռուսաստանը «Մայդան-3» է պատրաստում Ուկրաինայում. Զելենսկի

Ուկրաինայի նախագահ Վլադիմիր Զելենսկին Bloomberg-ին տված հարցազրույցում ասել է, որ Ռուսաստանը նախապատրաստում է ուկրաինական հասարակությանը ապատեղեկատվության գործողություն՝ երկրում պառակտում ստեղծելու և «քաոս» սերմանելու համար, ինչը կհանգեցնի գործող իշխանության հեռացմանը։

Նախագահի խոսքով՝ Ուկրաինայի հետախուզության տվյալները հաստատել են նաև Ուկրաինայի դաշնակիցները։ Bloomberg-ը պարզաբանում է, որ երկրում այս պլանը հայտնի է դարձել որպես «Մայդան-3», քանի որ ռուսական իշխանությունները 2014-ին նախագահ Վիկտոր Յանուկովիչի հրաժարականին հանգեցրած բողոքի ամիսները համարում են հեղաշրջում։ «Մայդանը նրանց համար հեղաշրջում է, ուստի գործողությունը պարզ է»,- հավելել է Զելենսկին։

Ավելի վաղ Online.ua-ն գրել էր «Մայդան-3» լայնածավալ տեղեկատվական հարձակման մասին, որի նպատակն էր ապակայունացնել Ուկրաինան՝ վկայակոչելով Ուկրաինայի իրավապահ մարմինների իր աղբյուրները։ Ըստ նրանց՝ ռուսական հատուկ ծառայությունների տեղեկատվական արշավը նախատեսված է 2023 թվականի նոյեմբեր-դեկտեմբեր ամիսներին։ Ենթադրվում է նաև, որ գործողության կուրատորը իբր Կրեմլի քաղաքական բլոկի ղեկավար Սերգեյ Կիրիենկոն է, իսկ գաղափարախոսը եղել է ՌԴ նախագահի նախկին օգնական Վլադիսլավ Սուրկովը։