Լեհաստանն արձագանքել է ԵՄ-ի` ՀՀ-ի հետ վիզաների ազատականացման մասին քննարկումներին
Լեհաստանի կառավարությունն աջակցում է Հայաստանի տարածքային ամբողջականությանը և ինքնիշխանությանը ու ցանկանում, որպեսզի հայերը խաղաղ ապրեն միջազգայնորեն ճանաչված տարածքում: Լրագրողների հետ զրույցում այս մասին ասաց ՀՀ-ում Լեհաստանի դեսպան Պյոտր Սկվեչինսկին:
Լեհաստանի դեսպանը, անդրադառնալով ԵՄ արտաքին գործերի նախարարների խորհրդի՝ Հայաստանի հետ վիզաների ազատականացման շուրջ բանակցություններ սկսելու որոշմանը, ընդգծեց, որ այս հարցում Լեհաստանը միանշանակ Հայաստանի համար խնդիրներ ստեղծող պետություն չէ:
«Գիտեք, որ Հայաստանի հետ վիզաների ազատականացման շուրջ բանակցություններն արդեն ընթացքի մեջ են, և ես հուսով եմ, որ ի վերջո կհասնենք այս նպատակին և մուտքի արտոնագրերի ազատականացումը իրականություն կդառնա»,-ասաց Լեհաստանի դեսպանը:
