Էրդողանը «խաչ է քաշել» Նեթանյահուի վրա. նրանք այլևս չեն շփվի

Թուրքիայի նախագահ Ռեջեփ Թայիփ Էրդողանը հայտարարել է Իսրայելի կառավարության ղեկավար Բենյամին Նեթանյահուի հետ հետագա շփումներից հրաժարվելու մասին։

«Մենք այլևս չենք կարող խոսել Նեթանյահուի հետ, մենք նրան ջնջել ենք»,- Էրդողանի խոսքերն է մեջբերում արաբական al-Arabiya հեռուստաալիքը։ 

Նա նշել է, թե Թուրքիան այլևս չի ունենա վստահություն գլոբալ համակարգի նկատմամբ, քանի դեռ Իսրայելը կանգ չի առել և պատասխանատվություն չի կրել «ռազմական հանցագործությունների և մարդու իրավունքների ոտնահարումների» համար: 

Էրդողանը նախկինում Իսրայելին կոչ է արել դադարեցնել Գազայի վրա շարունակվող հարձակումները և «դուրս գալ խելագար վիճակից»։ 

«Կանայք, երեխաներ, անմեղ քաղաքացիական անձինք ենթարկվում են Իսրայելի անընդհատ աճող, ավելի ակտիվ ռմբակոծություններին, հումանիտար ճգնաժամը խորանում է», - ասել է Թուրքիայի նախագահը։