Իսրայելը քննարկում է ՀԱՄԱՍ շարժման առաջնորդներին, ներառյալ նրա զինյալ թևին, թույլ տալ ազատորեն լքել Գազայի հատվածը՝ բոլոր պատանդներին ազատ արձակելու դիմաց, քանի որ դա միևնույն ժամանակ թույլ կտա կարճ ժամկետում ավարտել պատերազմը եւ միևնույն ժամանակ հայտարարել, որ անկլավում խմբավորման ենթակառուցվածքի ոչնչացման հայտարարված նպատակները ձեռք են բերվել։ Այս մասին հայտնել է իսրայելական Yedioth Ahronoth թերթը: Տեղեկությունը փոխանցում է ՌԻԱ Նովոստին։ 

Պարբերականը նշում է, որ Գազայի հատվածում ՀԱՄԱՍ-ի ողջ կենդանի ուժի եւ ենթակառուցվածքի ֆիզիկական ոչնչացումը ներկայիս ռազմական արշավի շրջանակներում տարիներ կտևի, իսկ ամենակարևորը՝ մեծ կորուստների կհանգեցնի:

«Այդ պատճառով Իսրայելում և միջազգային հանրությունում շրջանառվում են գաղափարներ, որոնք թույլ կտան կրճատել այդ գործընթացը և հասնել ՀԱՄԱՍ-ի հանձնմանը Գազայի հատվածում որքան հնարավոր է շուտ։ Դրանում շահագրգիռ անձինք դիտարկում են ՀԱՄԱՍ-ի ռազմական թևի անդամների, այդ թվում ՝ նրա առաջնորդների, Գազայի հատվածից Իսրայելի համաձայնությամբ դուրս գալու հնարավորությունը, որոնք կկարողանան պահպանել իրենց կյանքը՝ բոլոր պատանդներին ազատ արձակելու դիմաց»,- գրում է թերթը։  

Հոդվածի հեղինակը զուգահեռ է անցկացնում «1982 թվականի Բեյրութի մոդելի» հետ, երբ Պաղեստինի ազատագրման կազմակերպության անդամները Յասեր Արաֆաթի գլխավորությամբ կարողացան իսրայելական բանակի կողմից պաշարված Բեյրութից տեղափոխվել Թունիս։ 

Հրատարակության համաձայն՝ այս թեման վերջերս բազմիցս քննարկվել է մամուլում, ինչպես նաև տարբեր հանդիպումների ժամանակ, որոնց մասնակցել է Իսրայելի վարչապետ Բենիամին Նեթանյահուն։ Հրապարակման հեղինակը պնդում է, որ Նեթանյահուն մեծ հետաքրքրություն է ցուցաբերել այս թեմայի նկատմամբ և լրացուցիչ նյութեր է խնդրել։

Միևնույն ժամանակ, թերթը նշում է, որ այս գաղափարը խնդրահարույց կողմեր ​​ունի, քանի որ Իսրայելի հայտարարած պատերազմական նպատակներին հասնելը ոչ միայն ՀԱՄԱՍ-ի ղեկավարության վերացումն է, այլ նաև շարժման հազարավոր ակտիվիստների գործունեությունը և նրա ռազմական ենթակառուցվածքը ոչնչացնելը՝ բոլոր թունելներով, բունկերներով, հրթիռների արտադրության գործարաններով եւ այլն: