Նոր օրենք՝ Հայաստանից, Վրաստանից, Ադրբեջանից և այլ երկրներից Ռուսաստան ժամանած օտարերկրացիների համար
Մոսկվայում և Մոսկվայի մարզում սեպտեմբերի 1-ից մեկնարկում է աշխատելու համար Ռուսաստան ժամանած օտարերկրյա քաղաքացիների գտնվելու վայրի փորձնական հաշվառում «Ամինա» հավելվածի միջոցով. փորձնական ռեժիմը նախատեսված է փոխարինելու միգրացիոն հաշվառման գործող կարգը։ Այս մասին հաղորդում է «Ինտերֆաքս» գործակալությունը:
Հաղորդագրության համաձայն, որը հրապարակվել է Մոսկվայի Բազմաֆունկցիոնալ միգրացիոն կենտրոնի կայքում, Հայաստանի, Վրաստանի, Ադրբեջանի, Ուզբեկստանի, Տաջիկստանի, Ղրղզստանի, Ղազախստանի, Մոլդովայի և Ուկրաինայի քաղաքացիներին, որոնք Մոսկվա և Մոսկվայի մարզ են ժամանում աշխատելու համար, անհրաժեշտ կլինի պարտադիր կարգով ներբեռնել «Ամինա» հատուկ բջջային հավելվածը։
Հավելվածը, ինչպես նշվում է հաղորդագրության մեջ, «կպարզեցնի օտարերկրյա քաղաքացիների հաշվառումը, ինչը միգրացիոն օրենսդրության պահպանումն ավելի հարմար կդարձնի բարեխիղճ օտարերկրացիների համար»։ «Ամինա»-ն թույլ կտա գրանցվել Բազմաֆունկցիոնալ միգրացիոն կենտրոնի հասցեում և հավելվածի միջոցով ներքին գործերի մարմիններին հեռավար կերպով տեղեկացնել բնակության վայրի ու դրա փոփոխության մասին։
Հավելենք՝ օտարերկրյա քաղաքացիներն իրենք պետք է ներբեռնեն հավելվածը. իրավազորման համար անհրաժեշտ է օտարերկրյա քաղաքացու գործող քարտ։ Դրա ձևակերպման համար անհրաժեշտ է դիմել Բազմաֆունկցիոնալ միգրացիոն կենտրոն։ Բջջային հավելվածը Ռուսաստանի ներքին գործերի նախարարությանը կփոխանցի գեոլոկացիայի մասին տվյալները։
