ԵԽԽՎ համազեկուցողները կգան Հայաստան, կմեկնեն Երասխ. ինչ է սպասվում
Նոյեմբերի 6-8-ը ԵԽԽՎ` Հայաստանի պարտավորությունների կատարման մոնիտորինգի գծով համազեկուցողներ Կիմմո Կիլյունենը (Ֆինլանդիա) և Բորիանա Աբերգը (Շվեդիա) փաստահավաք այց կկատարեն Հայաստան, նշվում է Եվրոպայի խորհրդի կայքէջում:
Հաղորդագրությունում նշվում է, որ համազեկուցողները Երևանում գտնվելու ընթացքում կհանդիպեն վարչապետի, արդարադատության և ներքին գործերի նախարարների, ինչպես նաև Ազգային ժողովի պատգամավորների հետ:
Բացի դա, «նախատեսվում են բանակցություններ Սահմանադրական դատարանի նախագահի և դատական իշխանության, Կոռուպցիայի կանխարգելման հանձնաժողովի, Կենտրոնական ընտրական հանձնաժողովի ու Հեռուստատեսության և ռադիոյի ազգային հանձնաժողովի ներկայացուցիչների հետ»:
Ի թիվս նախատեսվող հանդիպումների, ԵԽԽՎ համազեկուցողները կմեկնեն Երասխ, որտեղ կհանդիպեն տեղի իշխանությունների և բռնի տեղահանված արցախցիների հետ:
