Մոտ ժամանակներս դրական տեղաշարժ կլինի նաև Թուրքիայի հետ հարաբերություններում․ Ալեն Սիմոնյան

Հայաստանով անցնող միջազգային կոմունիկացիաների անվտանգության ապահովմամբ կզբաղվի Ազգային անվտանգության ծառայության ստորաբաժանումներից մեկը։ Այս մասին լրագրողների հետ զրույցում հայտնել է ԱԺ նախագահ Ալեն Սիմոնյանը՝ հավելելով, որ կա արդեն ձևավորված կառույց, որը կզբաղվի կոմունիկացիաներով:

Խոսելով «Խաղաղության խաչմերուկ» նախագծից՝ Սիմոնյանն ասել է, որ «միջանցքի» թեման այլևս ակտուալ չէ, իսկ խաղաղության մասին խոսակցություններն ակտիվացել են ոչ միայն Հայաստանի, այլև հարևան երկրի ղեկավարության կողմից:

«ՀՀ-ն չի կարող իրեն դուրս դնել տարածաշրջանի տնտեսական, առևտրային հարաբերություններից: Մենք պետք է ամեն ինչ անենք, որ բոլոր ճանապարհները՝ Ադրբեջանի, Թուրքիայի հետ բացվեն, և ես ձեզ խոստանում եմ այդ պարագայում Հայաստանի տնտեսությունը, եթե հիմա 11, 12, 14 տոկոս ենք ունենում, կրկնակի, եռապատիկ աճ է ունենալու, և մեր քաղաքացիները տեսնելու են: Էլ չեմ ասում, որ վերջապես խաղաղություն ենք ունենալու, ունենալու ենք խաղաղ երկիր»,- նշել է ԱԺ նախագահը։ 

Ըստ Սիմոնյանի՝ մոտ ժամանակներս դրական տեղաշարժ կլինի նաև Թուրքիայի հետ հարաբերություններում: