Թուրքիայի խորհրդարանում ՆԱՏՕ-ին Շվեդիայի անդամակցությունը վավերացնելու մասին նախագիծ է ստորագրվել

Թուրքիայի Ազգային մեծ ժողովի խոսնակ Նուման Քուրթուլմուշը ստորագրել է ՆԱՏՕ-ին Շվեդիայի անդամակցության վավերացման մասին օրինագիծը, այն հանձնել է հանձնաժողովի քննարկմանը: Տեղելությունը փոխանցում է ՌԻԱ Նովոստին։ 

Հյուսիսատլանտյան պայմանագրին Շվեդիայի անդամակցության մասին արձանագրության վավերացմանը հավանություն տալու մասին օրինագիծը փոխանցվել է Թուրքիայի Ազգային մեծ ժողովի արտաքին գործերի կոմիտեին: Արձանագրության հիմնավորման մեջ նշվել է, որ «դաշինքին անդամակցելու համատեղ հայտ ներկայացրած Ֆինլանդիան եւ Շվեդիան սահմանվում են որպես ՆԱՏՕ-ի երկու ամենամոտ գործընկերներ», եւ «այդ երկու երկրները դաշինքի հետ համակողմանի եւ բազմակողմանի համագործակցություն են իրականացրել հայտի ներկայացմանը նախորդող ժամանակահատվածում, նրանք առանձնանում են պաշտպանության եւ անվտանգության ոլորտում իրենց հնարավորություններով եւ ներուժով»:

Հիշեցնենք, որ ավելի վաղ Թուրքիայի առաջնորդ Ռեջեփ Թայիփ Էրդողանն առաջարկել էր իր երկրի խորհրդարանին վավերացնել Հյուսիսատլանտյան դաշինքին Շվեդիայի անդամակցության արձանագրությունը։