Պատշաճ պահի կպատասխանենք ամերիկացիներին. Ռուսաստանն ԱՄՆ-ից սպառազինությունների վերահսկման առաջարկներ է ստացել

ՌԴ-ն ԱՄՆ-ից առաջարկներ է ստացել ռազմավարական կայունության և սպառազինությունների վերահսկման շուրջ երկխոսության վերսկսման վերաբերյալ, այս պահին դրանք ուսումնասիրվում են, լրագրողներին հայտարարել է ՌԴ ԱԳ փոխնախարար Սերգեյ Ռյաբկովը: Տեղեկությունը փոխանցում է ՌԻԱ Նովոստին:
 

«Դա այդպես է, non paper-ի տեսքով, այսինքն՝ գրավոր, բայց ոչ պաշտոնական հուշագրի տեսքով: Այժմ մենք դրանք վերլուծում ենք միջգերատեսչական ձևաչափով»,- լրագրողներին ասել է Ռյաբկովը։

«Նորության տարրեր չկան։ Սա հայտնի դիրքորոշում է, պարզապես այն ի մի է բերվել։ Մենք հանգիստ ուսումնասիրում ենք և պատշաճ պահի կպատասխանենք ամերիկացիներին, թե ինչ ձևով` դեռ վաղաժամ է խոսել»,- հավելեց նա։  

Ռյաբկովի խոսքով՝ ԱՄՆ-ն «առաջարկում է համակարգված հիմքի վրա դնել ռազմավարական կայունության եւ սպառազինությունների վերահսկման շուրջ երկխոսության վարումը, ընդ որում՝ դա անել ամեն ինչից զատ. մենք դրան պատրաստ չենք»: 

«Մենք կարծում ենք, որ առանց ԱՄՆ-ի կողմից Ռուսաստանի նկատմամբ խորը ֆունդամենտալ թշնամական կուրսի փոփոխության, ռազմավարական կայունության շուրջ երկխոսությանը վերադառնալը, ներառյալ ռազմավարական հարձակողական սպառազինությունների թեմատիկան եւ այլ սյուժեներ, ինչպես դա նախկինում էր կիրառվում, պարզապես անհնար է»,- ընդգծել է Ռյաբկովը: