Խաղաղության օրակարգի վերաբերյալ հերթական պատասխանը տալու մեր հերթն է. Միրզոյան
ՀՀ իշխանություններն Ադրբեջանից արդեն ստացել են խաղաղության օրակարգի հետ կապված հերթական առաջարկներն ու այժմ հերթական պատասխանը տալու մեր հերթն է։ Այս մասին Ազգային ժողովում կառավարության հետ հարցուպատասխանի ժամանակ հայտարարեց ՀՀ արտաքին գործերի նախարար Արարատ Միրզոյանը։
«Այն, որ Ադրբեջանը խաղաղության պայմանագրի նախագծի հերթական առաջարկներ է փոխանցել, դա նոր չէ։ Ես չեմ հասկանում` ինչու է դա նորից մամուլում շրջանառվում։ ՀՀ իշխանություններն Ադրբեջանից արդեն որոշակի ժամանակ է, ինչ ստացել են խաղաղության օրակարգի հետ կապված հերթական առաջարկներն ու այժմ մեր հերթն է` հերթական պատասխանը տալու»,– նշեց Միրզոյանը։
Նախարարի խոսքով` եթե հայկական կողմը ստանա նաև Ադրբեջանի ղեկավարի հաստատումը երկու երկրների ղեկավարների առաջիկա հանդիպումների մասին, ապա դա ևս մի քայլ առաջ կլինի։
«Խաղաղության պայմանագրի զուտ տեքստի առումով կրկին ուզում եմ զգուշավոր լավատեսություն հայտնել»,– իր խոսքը եզրափակեց ՀՀ ԱԳ նախարարը։
