ՏԵՍԱՆՅՈՒԹ. Վլադիմիր Սոլովյովը ներողություն է խնդրել ՌԴ ԱԳՆ-ից
Հեռուստահաղորդավար Վլադիմիր Սոլովյովը ներողություն է խնդրել ՌԴ ԱԳՆ-ից, ինչպես նաև Զախարովայից և Բոգդանովից Սատանովսկու հարցազրույցի համար:
Հեռուստահաղորդավարն իր Telegram ալիքում ասել է, որ իր գործընկեր Եվգենի Սատանովսկու հայտարարությունները «անարդար են և անընդունելի»։ Սոլովյովի խոսքով՝ որոշում է կայացվել Սատանովսկուն հեռացնել Solovyov Live հեռուստաալիքից։
Նշենք, որ համացանցում հայտնվել է Սատանովսկու՝ իսրայելցի լրագրողի հետ հարցազրույցից հատված։ Դրանում փորձագետը, խոսելով Իսրայելում տիրող իրավիճակի մասին, վիրավորել է Մարիա Զախարովային իր դիրքորոշման համար և ակնարկել, որ ինքը և Միխայիլ Բոգդանովը «շատ են խմում»։ Նա նաեւ դատապարտել է նրանց «հակաիսրայելական հայտարարությունների համար»։
«Ցանկանում եմ ներողություն խնդրել Ռուսաստանի Դաշնության արտաքին գործերի նախարարությունից, պարոն Բոգդանովից և տիկին Զախարովայից մեր ալիքի աշխատակից Եվգենի Յանովիչ Սատանովսկու կողմից բացարձակապես անարդար բովանդակությամբ և ձևով անընդունելի հայտարարությունների համար»,-ասել է Վլադիմիր Սոլովյովը:
