Բռնի տեղահանված 13 888 երեխա հաճախում է հայաստանյան կրթական հաստատություններ
Առողջության պահպանման առաջնային օղակներում այս պահի դրությամբ արդեն իսկ կցագրվել է ԼՂ-ից բռնի տեղահանված 28 861 անձ: Այս մասին այսօր՝ հոկտեմբերի 16-ին, հայտնեց վարչապետի մամուլի խոսնակ Նազելի Բաղդասարյանը՝ ներկայացնելով «Հումանիտար կենտրոն»-ի կողմից ցուցաբերվող աջակցության աշխատանքները։
Անդրադառնալով կրթության ոլորտին՝ Նազելի Բաղդասարյանը նշեց, որ ԼՂ-ից բռնի տեղահանված աշակերտները շարունակում են համալրել ՀՀ կրթական հաստատությունները: Նրանցից 13 888-ն արդեն իսկ հաճախում են հայաստանյան կրթական հաստատություններ:
Ըստ այդմ՝ Երևանում՝ 4363, Կոտայքում՝ 2408, Արարատում՝ 1929, Արմավիրում՝ 1227, Լոռիում՝ 820, Գեղարքունիքում՝ 676, Արագածոտնում՝ 622, Շիրակում՝ 576, Սյունիքում՝ 554, Տավուշում՝ 423, Վայոց ձորում՝ 290 անձ:
Ընթացիկ շաբաթում կգործարկվի հարթակ, որի միջոցով ուսուցիչներն արտամրցութային կարգով կհամալրեն կրթական հաստատությունները:
