Իսրայելի պատասխանը դուրս է գալիս ինքնապաշտպանության իրավունքից. Եգիպտոսի նախագահ
Եգիպտոսի նախագահ Աբդել Ֆաթահ ալ-Սիսին Կահիրեում ԱՄՆ պետքարտուղար Էնթոնի Բլինքենի հետ հանդիպման ժամանակ ասել է, որ Գազայի հատվածում պաղեստինյան ՀԱՄԱՍ խմբավորման գործողությունների դեմ Իսրայելի պատասխանը դուրս է գալիս նրա ինքնապաշտպանության իրավունքից։ Պետության ղեկավարի խոսքերը հեռարձակել է Al Arabiya հեռուստաալիքը։
«Իսրայելի պատասխանը գերազանցում է ինքնապաշտպանության իրավունքը և հավասարազոր է կոլեկտիվ պատժի»,- ասել է նա։
Եգիպտոսի նախագահը նաև կոչ է արել դյուրացնել Գազայի հատված մարդասիրական օգնության առաքումը։
Նախօրեին Արաբական պետությունների լիգայի (LAS) գլխավոր քարտուղարի օգնական Հուսամ Զաքին ասել էր, որ մոտ ապագայում Գազայի հատվածում կարող է ուժի մեջ մտնել իսրայելական և պաղեստինյան կողմերի միջև հումանիտար զինադադարը։ Նրա խոսքով՝ Կահիրեն ներկայումս գործադրում է բոլոր ջանքերը՝ Գազա մարդասիրական օգնություն հասցնելու համար։
Ավելի վաղ Իսրայելի պաշտպանության նախարարության ղեկավար Գալանտը խոստացել էր վերացնել ՀԱՄԱՍ-ի բոլոր արմատականներին։
