36 վագոնից բաղկացած բեռնատար գնացքը դուրս է եկել ռելսերից․ Քարակերտ–Դալարիկ հատված
Քարակերտ–Դալարիկ հատվածում «Հարավկովկասյան երկաթուղի» ընկերության բեռնատար գնացքը դուրս է եկել գծերից։ Այս մասին հայտնում է ընկերության մամուլի ծառայությունը։
36 վագոնից բաղկացած գնացքը մասամբ բեռնված է եղել ցեմենտ արտադրելու հումքով, բայց եղել են նաև դատարկ վագոններ։ Միջադեպի հետևանքով զոհեր չկան։
Բացի շարժակազմից, վնասվել է նաև երկաթուղային գիծը։ Այժմ ընկերությունը վթարավերականգնողական աշխատանքներ է իրականացնում։ Նախատեսվում է, որ վթարի հետևանքները կվերացվեն 2 օրում։
Այս ժամանակահատվածում երթևեկությունը դադարեցվել է, ինչի պատճառով չեղարկվել են Երևան–Գյումրի–Երևան մերձքաղաքային ուղևորատար գնացքների, ինչպես նաև Երևան–Թբիլիսի–Երևան միջազգային ուղերթերը։
Դեպքի հանգամանքները պարզելու համար հետաքննություն է տարվում։
