Վեց ադրբեջանցի է մահացել․ կրկին հայերին են մեղադրում

Ադրբեջանական լրատվամիջոցները հայտնում են, թե իբր Արցախի Մարտունու` Ադրբեջանի վերահսկողության տակ անցած տարածքներում ականի պայթյունից վեց ադրբեջանցի է մահացել։ 

Նրանցից երկուսը եղել են ճանապարհների պետական ​​գործակալության աշխատակիցներ, որոնք իբրև պայթել են տեղում պայմանագրային աշխատանքներ կատարելիս։ Ինչպես գրում են լրատվամիջոցները, դեպքի վայր են մեկնել ոստիկանները, նրանցից 4–ը ևս պայթել են ականի վրա։ 

Նրանց անուններն արդեն հայտնի են՝ Ջամալզադե Ասիմ Պրինս օղլու (ծնված 05.02.1994թ.), Շիրինով Ռամիլ Արիֆ օղլու (ծնված 08.07.1987թ.), Մահմուդով Սեյմուր Էլսեվիար օղլու (ծնված 07.12.1991թ.) և Զամանով Խազար Ազեր օղլու (ծնված. 21.07.1998թ.)։

Ադրբեջանի գլխավոր դատախազությունը, ներքին գործերի նախարարությունը և պետական ​​անվտանգության ծառայությունը համատեղ հայտարարություն են տարածել, որում կատարվածի համար մեղադրում են «հայ դիվերսանտներին»։ Սակայն ավելի վաղ հայտնել էինք, որ ՊԲ–ն հերքել է Բաքվի հայտարարությունը, թե իբր Ահմեդբեյլի-Ֆուզուլի-Շուշի ավտոճանապարհի 58-րդ կիլոմետրում Լեռնային Ղարաբաղի պաշտպանության բանակի ստորաբաժանումները դիվերսիա են կատարել և հակատանկային ական են տեղադրել, որի պայթյունից երկու խաղաղ բնակիչ է զոհվել։