«Կոչ ենք անում հայկական քաղաքական ղեկավարությանը կատարել գլխավոր քայլը». Հաջիև

Ադրբեջանի նախագահ Իլհամ Ալիևի օգնական Հիքմեթ Հաջիևը հայտարարել է, որ երկրի ղեկավարությունն ակնկալում է Հայաստանի հետ խաղաղության պայմանագիր կնքել մինչև այս տարվա վերջ: Նրա խոսքով՝ Բաքուն մտադիր է Երևանի հետ բոլոր տարաձայնությունները լուծել բացառապես խաղաղ ճանապարհով։ Այս մասին հայտնում է kommersant.ru-ն:

«Մենք հույս ունենք, որ խաղաղության պայմանագիրը կստորագրվի մինչև այս տարվա վերջ և կոչ ենք անում հայկական քաղաքական ղեկավարությանը կատարել գլխավոր քայլը՝ պաշտոնապես, խաղաղության պայմանագրի տակ իր ստորագրությամբ, արձանագրել Ադրբեջանի տարածքային ամբողջականության ճանաչումը, ներառյալ մեր հանրապետության Ղարաբաղյան տնտեսական տարածաշրջանը»,— ասել է Հաջիևը ՏԱՍՍ-ին տված հարցազրույցում:

Հաջիևի խոսքով ՝ Ադրբեջանը մտադիր է ինքնուրույն պաշտպանել Լեռնային Ղարաբաղի բնակիչների իրավունքները, քանի որ նրանք բնակվում են երկրի միջազգայնորեն ճանաչված տարածքում: 

Մեկնաբանելով հնարավոր փոխզիջումների թեման, որոնց պատրաստ է գնալ Բաքուն Երեւանի հետ երկխոսության ընթացքում՝ Հաջիեւը նշել է, որ ադրբեջանական կողմը չի քննարկի «ոչ Հայաստանի, ոչ էլ որեւէ երրորդ երկրի հետ հարցեր, որոնք կասկածի տակ են դնում Ադրբեջանի տարածքային ամբողջականությունն ու ինքնիշխանությունը»:

Նկատենք, որ Ադրբեջանի կառավարությունը հաճախ ոտնահարում է նույնիսկ ադրբեջանցիների իրավունքները, հետևաբար Ադրբեջանի կողմից Լեռնային Ղարաբաղի բնակիչների իրավունքների պաշտպանության մասին խոսք լինել չի կարող: