Ցանկանում ենք, որ Լաչինի միջանցքը անհապաղ բացվի՝ սարսափելի հումանիտար իրավիճակը լուծելու համար. Միլլեր

Կովկասում ԱՄՆ-ի բանակցային հարցերով ավագ խորհրդական Լուիս Բոնոն, ով սեպտեմբերի 14-ին Երևանում էր, շարունակում է զբաղվել և՛ կարճաժամկետ առաջնահերթությամբ, որը Լաչինի միջանցքի վերաբացումն է, և՛ երկարաժամկետ առաջնահերթությամբ: Այս մասին ճեպազրույցում հայտարարել է ԱՄՆ պետդեպարտամենտի խոսնակ Մեթյու Միլլերը: Նա ընդգծել է, որ երկարաժամկետ առաջնահերթությունը վերաբերում է խաղաղ կարգավորմանը, որին ձգտում են հնարավորինս շուտ հասնել: 

Նա չի հստակեցրել, թե արդյոք Բոնոն կայցելի  նաև Բաքու: 

«Ես չեմ պատրաստվում մեկնաբանել, բայց եթե դուք զանգահարեք համապատասխան բյուրոյին, վստահ եմ, որ նրանք կարող են ձեզ մանրամասնել»,-ասել է նա: 

Հարց է հնչել նաև Լեռնային Ղարաբաղում տիրող հումանիտար ճգնաժամի վերաբերյալ: Վերջերս ամերիկացի օրենսդիրներից մեկը նամակ է գրել նախագահ Բայդենին, որում ասվում է. 

«Միացյալ Նահանգները պետք է ճանաչի այս ցեղասպանությունը և համապատասխանաբար գործի, որպեսզի փրկի հնարավորինս շատ կյանքեր»: Ո՞րն է Պետդեպարտամենտի ուղերձը տառապող հայ քրիստոնյաներին, հետաքրքրվել է լրագրողը: 

«Մենք ցանկանում ենք, որ Լաչինի միջանցքը անմիջապես բացվի: Մենք դա հստակ ասել ենք։ Պետքարտուղար Բլինքենը համագործակցել է և՛ Հայաստանի, և՛ Ադրբեջանի ղեկավարների հետ՝ հասկացնելու համար, որ մենք ցանկանում ենք, որ Լաչինի միջանցքը անհապաղ բացվի՝ Լեռնային Ղարաբաղում իսկապես սարսափելի հումանիտար իրավիճակը լուծելու համար»,-պատասխանել է Միլլերը: