«Կիևն անհեթեթ, հակասություններից բաղկացած բանաձևեր է հորինելու». Զախարովա
Ուկրաինայի նախագահ Վլադիմիր Զելենսկին տարատեսակ «կազուիստիկ արտահայտություններ» է հորինելու, որպեսզի Ռուսաստանի հետ խաղաղության ձգտելու պատրանք ստեղծի։ Այս մասին ՌԻԱ Նովոստիին տված հարցազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Կարծում եմ` նրանք կազուիստիկ արտահայտություններ են հորինելու, որպեսզի ձևացնեն, թե խաղաղության են ձգտում, այդ ուղղությամբ գործնական քայլերի բացակայության պարագայում», – Արևելյան տնտեսական համաժողով-2023–ի շրջանակում ասել է Զախարովան` պատասխանելով հարցին, թե որքան է հավանական, որ Ուկրաինայում կչեղարկեն ՌԴ–ի հետ բանակցություններն արգելող Զելենսկու հրամանը։
Նա հավելել է, որ Կիևն անհեթեթ, հակասություններից բաղկացած բանաձևեր է հորինելու։
«Զելենսկու խաղաղության բանաձևում խաղաղության մասին որևէ բան չի ասվում, այնտեղ միայն ուժային սցենարներ են և այլն, բայց կոչվում է «խաղաղության բանաձև», նրանք այդպիսի ձևակերպումներ են հորինելու, իբր Ուկրաինան պատրաստ է խաղաղության, պարզապես պետք է, որ Ռուսաստանն առաջարկի և ասի նրան այդ մասին», – հավելել է Զախարովան։
2022 թվականի նոյեմբերին Զելենսկին հայտարարեց, որ Կիևը «խաղաղության հասնելու» իր ծրագիրն ունի, որը բաղկացած է 10 կետից։ Այդ թվում` միջուկային, պարենային և էներգետիկ անվտանգության ապահովում, «բոլորը բոլորի դիմաց» ձևաչափով պահվող անձանց փոխանակում, Ուկրաինայի տարածքային ամբողջականության վերականգնում։ Զելենսկին կրկին հիշեցրել է, որ Կիևը պնդում է, որ իրեն անվտանգության միջազգային երաշխիքներ տրամադրեն և համապատասխան փաստաթղթի նախագիծ է մշակել։ Նա հավելել է, որ Կիևն ուզում է հասնել ռուսական ակտիվների հաշվին մարտական գործողություններից կրած վնասների փոխհատուցման միջազգային մեխանիզմի ստեղծման։
