Տարաձայնություններ, քննարկումներ են լինում, դա չի կարելի մեկնաբանել՝ ռուսական կողմի հետ լարվածություն. ԱԳ փոխնախարար

Հայաստանի փոխարտգործնախարար Պարույր Հովհաննիսյանը պնդում է, որ բոլոր գործընկերների հետ էլ լինում են տարաձայնություններ, բայց չի նշանակում, որ դա կարելի է մեկնաբանել որպես լարվածություն։ Այս մասին նա հայտարարեց ԱԺ–ում լրագրողների հետ ճեպազրույցի ժամանակ պատասխանելով հարցին, թե ինչի հետ է կապված վերջին շրջանում Ռուսաստանի հետ հարաբերությունների լարվածությունը։

«Ռուսաստանի հետ ընթանում են աշխատանքային հարաբերություններ, ինչպես ունենում ենք մյուս գործընկերների հետ: Տարաձայնություններ, քննարկումներ, դա չի նշանակում, որ դա կարելի է մեկնաբանել որպես լարվածություն: Աշխատանքային կարգով գնում է տարբեր հարցերի շուրջ քննարկումներ»,- ասաց Պարույր Հովհաննիսյանը:

Հարցին՝ արդյո՞ք Հայաստանն այժմ դիտարկում է ՀԱՊԿ-ից դուրս գալը, փոխնախարարն ասաց. «Գիտեք, որ հայտարարությունները այդ հարցով ինչպես են ընթանում, մենք այդ հարցին անդրադարձել ենք: Մենք քննադատում ենք ՀԱՊԿ-ին մի շարք հարցերի հետ կապված, բայց այժմ այդ հարցը մեր օրակարգում չէ»: