Չինացի պաշտոնյաներին արգելվել է օգտագործել iPhone կամ արտասահմանյան արտադրության այլ տեխնիկա․ WSJ

Չինաստանի իշխանությունները արգելել են պետծառայողներին աշխատանքի համար օգտագործել iPhone կամ արտասահմանյան արտադրության այլ տեխնիկա։ Այս մասին գրում է The Wall Street Journal պարբերականը՝ հղում անելով իր աղբյուրներին, հայտնում է ՏԱՍՍ-ը։ 

Պարբերականի տեղեկություններով, Չինաստանի ղեկավարության «ոչ միայն չօգտագործել, այլև նման սարքերը գրասենյակ չբերել» հրամանը փոխանցվել է աշխատանքային չաթերի ներսում, ինչպես նաև համապատասխան հաստատություններում և գերատեսչություններում հայտարարությունների և հատուկ հանդիպումների միջոցով։ 

ՉԺՀ-ի քաղաքացիական ծառայողների նկատմամբ նմանատիպ միջոցներ նախկինում կիրառվել են ավելի փոքր մասշտաբով, մինչդեռ ներկայիս սահմանափակումները կընդգրկեն պաշտոնյաների և գերատեսչությունների «ընդլայնված շրջանակը»: Նշվում է, որ Չինաստանը երկար ժամանակ պատժամիջոցներ է սահմանում համակարգչային տեխնիկայի և ծրագրային ապահովման արտասահմանյան արտադրողների սարքերի վրա։

Ինչպես նշում է թերթը, ներկայիս սահմանափակումները կապված են Չինաստանի և ԱՄՆ-ի միջև սրված առճակատման հետ, որը ստիպել է երկու կողմերին ուժեղացնել պետական ​​վերահսկողությունը տվյալների անվտանգության և կառավարական գերատեսչությունների թվային գործունեության նկատմամբ։ Այս քայլը, իբր, դարձել է Չինաստանի իշխանությունների ջանքերի մի մասը՝ սահմանափակելու գաղտնի տեղեկատվության արտահոսքը արտասահման, ինչպես նաև նվազեցնելու երկրի կախվածությունը օտարերկրյա տեխնոլոգիաներից: