Ադրբեջանը փորձում է խաբել միջազգային հանրությանը․ Մարուքյան
Ալիևի օգնական Հիքմեթ Հաջիևը «Arab News»-ին տված հարցազրույցում ասել է, որ Լաչինի միջանցքը արգելափակված չէ, և Լեռնային Ղարաբաղում շրջափակում չկա։ Այս մասին X-ի իր էջում գրել է ՀՀ հատուկ հանձնարարություններով դեսպան Էդմոն Մարուքյանը։
«Այսպիսով, Ադրբեջանը փորձում է խաբել միջազգային հանրությանը Լաչինի միջանցքի անօրինական արգելափակման փաստի վերաբերյալ, ինչը հաստատվել է միջազգային այնպիսի հայտնի կազմակերպությունների կողմից, ինչպիսիք են «Human Rights Watch»-ը, ՄԱԿ-ի Անվտանգության խորհուրդը և հաստատվել է Արդարադատության միջազգային դատարանի միջանկյալ վճիռներով, որ միջանցքը փակ է, մարդիկ սովամահ են լինում։
Ի վերջո, եթե Լաչինի միջանցքը փակված չէ, և ԼՂ-ում շրջափակում ու սով չկա, ինչպես պնդում է Ալիևի օգնականը, ապա ինչո՞ւ է Ադրբեջանը այս խորհրդավոր մարդասիրական օգնությունն ուղարկել Աղդամ»,- գրել է նա։
