Իրականությանը չեն համապատասխանում լուսանկարներն ու գրառումը, թե Շենգավիթի դատարանն այլևս ՀՀ-ին չի ենթարկվում
Քրեագետ Տիգրան Պետրոսյանը ֆեյսբուքյան իր էջում Շենգավիթի դատարանից լուսանկար էր հրապարակել ու գրել, որ այն Երևանի Շենգավիթ վարչական շրջանի ընդհանուր իրավասության դատարանն է, 01․09․2023 թ․-ի դրությամբ։
Համացանցում տարածված այս լուրերին ի պատասխան ԲԴԽ մամուլի ծառայությունը պարզաբանում է տարածել․
«Տեղեկացնում ենք, որ ֆեյսբուքյան օգտատեր Տիգրան Պետրոսյանի կողմից տարածված գրառումը և լուսանկարները, որոնք տեղ են գտել նաև մամուլում, թե իբր «Շենգավիթի դատարանն այլևս ՀՀ-ին չի ենթարկվում. հարգվում է Վենեսուելայի կամ Կոլումբիայի դրոշը» իրականությանը չեն համապատասխանում:
Երևան քաղաքի ընդհանուր իրավասության քրեական դատարանի Շենգավիթի նստավայրում ծածանվել և ծածանվում է Հայաստանի Հանրապետության պետական դրոշը՝ լուսանկարները կից:
Օգտատիրոջ կողմից տարածված լուսանկարների կեղծ լինելը հավաստում են նաև պատկերված նստավայրի կողքին երևացող բարձրահարկ շինությունները, որոնք Շենգավիթի նստավայրի հարակից տարածքում երբևէ գոյություն չեն ունեցել և չունեն:
Խնդրում ենք զերծ մնալ հանրությանը մոլորեցնող տեղեկություններ տարածելուց»:
Տիգրան Պետրոսյանի տարածած լուսանկարները
ԲԴԽ մամուլի ծառայության պարզաբանման մեջ ներառված լուսանկարները
