Ադրբեջանական տեղեկատվական ցանցը նախապատրաստում էր հանրությանը ՀՀ-ի դեմ նոր գործողությունների․ ադրբեջանագետ

ԱԺ նախկին պատգամավոր, ադրբեջանագետ Տաթևիկ Հայրապետյանը ֆեյսբուքյան իր էջում գրել է. 

«Դեռևս օգոստոսի կեսերից ադրբեջանական տեղեկատվական ցանցը նախապատրաստում էր սեփական հանրությանը Հայաստանի դեմ նոր գործողությունների:

Ադրբեջանի իշխող ուժի պատգամավորը օգոստոսի 16–ի իր հարցազրույցում նշել էր, թե իբր «Հայաստանը զինտեխնիկա է տեղակայում Ադրբեջանի հետ պայմանական սահմանի երկայնքով, տարածվում են հրետանային կայանքների տեղափոխման հետ կապված կադրեր, ինչը հիշեցնում է է նախորդ տարվա սեպտեմբերի իրադարձությունները։ Նույնիսկ այն ժամանակ Հայաստանը կեղտոտ խաղեր էր խաղում, և հայտնի է, որ արդյունքում արյունալի իրադարձություններ տեղի ունեցան, Ադրբեջանը լուրջ հարվածներ հասցրեց Հայաստանին։ Նրանք զգացել են սեփական սադրանքների դառնությունը: Չի բացառվում, որ նման միջադեպի, սադրանքի դիմեն այս տարվա սեպտեմբերին։ Այդ դեպքում ադրբեջանական պետությունը դեռ կարող է հակաահաբեկչական գործողություն իրականացնել ՝ վկայակոչելով միջազգային իրավունքը։ Սա ոչ մի դեպքում անօրինական քայլ չի լինի, քանի որ ցանկացած պետություն ռազմական սադրանքի պայմաններում կցուցաբերեր հենց նման վարքագիծ։ Ադրբեջանը նույնպես կարող է ստիպված լինել նման քայլի գնալ, և այդ դեպքում բոլոր իրադարձությունների զարգացման պատասխանատվությունը կրում է Հայաստանի քաղաքական-ռազմական ղեկավարությունն ու նրանց հովանավորները»:

Մեկ այլ քարոզչական կայք էլ հոդված էր տարածել օգոստոսի 18–ին՝ նշելով, որ ՄԱԿ–ի ԱԽ նիստից հետո երրորդ պատերազմն ավելի է մոտեցել:

Քիչ թե շատ մտածող ցանկացած մեկի համար պարզ է, որ Ադրբեջանը հստակ նպատակաուղղված կերպով գնում է Հայաստանի դեմ նոր ագրեսիայի, որքան կտևի, թե ինչպիսի շարունակություն դա կունենա՝ կախված է միջազգայինների արձագանքից, իհարկե նաև՝ մեր բանակի կանխարգելիչ գործողություններից: Մեզ համար կարևոր է՝ տեղեկատվական առումով ճիշտ ներկայացնել իրավիճակն ու ցույց տալ, թե ինչպես է Ադրբեջանը քարոզել ագրեսիվ քայլեր: Դրա վերաբերյալ ես անգլերեն գրառումներ անում եմ թվիթերյան հարթակում, եթե ունեք օգտահաշիվներ կխնդրեմ ակտիվ լինել այդ տիրույթում ու տարածել: Հղումը՝ մեկնաբանությունում:

[3954c3fd923accefe92aa4c57116ccc9.jpg]

[a9927d1b42ea63699212f06cea2137dc.jpg]