Ավստրալիայում ուղղաթիռի կործանումից զոհվել է երեք ամերիկացի զինծառայող

Առնվազն երեք ամերիկացի զինծառայող է զոհվել կիրակի Ավստրալիայի հյուսիսային ափերի մոտ զորավարժությունների ժամանակ ծովային հետևակի ուղղաթիռի կործանման հետևանքով։ Այս մասին հայտնում է ABC News-ը՝ վկայակոչելով ԱՄՆ իշխանություններին։

Bell Boeing V-22 Osprey ուղղաթիռը, որում եղել է 23 անդամ, վթարի է ենթարկվել Ավստրալիայի հյուսիսային տարածքում գտնվող Տիվի կղզիների մոտ, ասվում է Դարվինում ծովային հետևակայինների ռոտացիոն ուժերի հայտարարության մեջ:

Հինգ այլ զինծառայող ծանր վիճակում տեղափոխվել է Դարվինի թագավորական հիվանդանոց։

«Վիրավորներն ԱՄՆ ծովային հետևակի կորպուսի անձնակազմի 23 անդամ են, և մենք անում ենք ամեն ինչ, որպեսզի նրանց ապահով վերադարձնենք Դարվին՝ բուժման համար»,- ասել է Ավստրալիայի Հյուսիսային տարածքի ոստիկանության հանձնակատար Մայքլ Մերֆին:

Նա հավելել է, որ 5 ծովային հետևակային տեղափոխվել է Դարվին՝ բուժման համար, իսկ մնացածները դեպքի վայրում հետազոտվում են։ Վթարի պատճառը դեռ պարզված չէ։

Հիշեցնենք՝ ավելի վաղ հայտնել էինք, որ Ավստրալիայի ափերի մոտ ամերիկյան ռազմական ուղղաթիռ է կործանվել։