ՔՊ-ական պատգամավորները նոր հանձնարարական են ստացել. «Հրապարակ»

ՔՊ-ական պատգամավորներին հանձնարարվել է մեկ մարդու պես մասնակցել Երևանի ավագանու ընտրությունների քարոզարշավին: Տեղեկությունը հայտնում է «Հրապարակ» օրաթերթը։

«Հատկապես մայրաքաղաքից ընտրվածները պետք է շրջեն իրենց վարչական շրջաններում, զրուցեն երևանցիների հետ: Բայց հրահանգվել է ոչ այնքան իրենց ցուցակի և թեկնածուի գովքն անել, որքան մրցակիցներին քննադատել»,– գրում է լրատվամիջոցը։

Ըստ թերթի` ՔՊ-ում Երևանի փոխքաղաքապետ Տիգրան Ավինյանի հիմնական մրցակից են դիտարկում «Ապրելու երկիր» կուսակցության թեկնածու Մանե Թանդիլյանին և նախկին քաղաքապետ Հայկ Մարությանին, հատկապես վերջինիս հարցում «վերևից» հրահանգ է իջել` անողոք լինել։

Լրատվամիջոցը գրում է, որ պաշտոնական քարոզարշավի մեկնարկն օգոստոսի 23-ին է, պատգամավորների արձակուրդն ավարտվում է օգոստոսի 25-ին, սակայն դա նշանակություն չունի` պետք է հենց 23-ից լծվեն աշխատանքի` առանց գլուխ պահելու։