Ուկրաինան չի հրավիրվել G20-ի գագաթնաժողովին. Հնդկաստանի վարչապետ

Ուկրաինան հրավիրված չէ G20-ի գագաթնաժողովին, որը տեղի կունենա սեպտեմբերի 9-10-ը Նյու Դելիում, քանի որ խումբը զբաղվում է տնտեսական զարգացման հարցերով, իսկ անվտանգության հարցերը լուծելու համար կա ՄԱԿ-ի Անվտանգության խորհուրդ։ Այս մասին հայտարարել է Հնդկաստանի արտգործնախարար Սուբրամանյամ Ջայշանքարը, հայտնում է ТАСС–ը:

«G20-ը զբաղվում է գլոբալ աճի, տնտեսության զարգացման խնդիրներով: Գագաթնաժողովում կքննարկվեն էներգետիկայի, պարարտանյութերի, պարենային մատակարարումների խնդիրները»,- ասել է նա Նյու Դելիում կայացած ճեպազրույցում՝ պատասխանելով այն հարցին, թե ինչու Ուկրաինան ներառվաշ չէ գագաթնաժողովին հրավիրված երկրների ցանկում։ 

Ջայշանքարի խոսքով՝ G20-ը չի զբաղվում գլոբալ անվտանգության խնդիրներով, այս թեմայի հարթակը ՄԱԿ-ի Անվտանգության խորհուրդն է։ 

Հնդիկ նախարարը հիշեցրել է նաև, որ սեպտեմբերին կայանալիք գագաթնաժողովի հրավերներն արդեն ուղարկվել են։ 

Հնդկաստանը G20-ում նախագահում է 2022 թվականի դեկտեմբերի 1-ից։ Գագաթնաժողովին հրավիրված են խմբի բոլոր առաջնորդները, ինչպես նաև ինը այլ երկրների՝ Բանգլադեշի, Եգիպտոսի, Մավրիկիոսի, Նիդեռլանդների, Նիգերիայի, Օմանի, Սինգապուրի, Իսպանիայի և Արաբական Միացյալ Էմիրությունների ղեկավարները։ Ավելի վաղ Հնդկաստանի արտգործնախարարության խոսնակ Արինդամ Բագչին հայտարարել էր, որ Նյու Դելին հույսը դնում է ասոցիացիայի բոլոր երկրների ղեկավարների մասնակցության վրա։