Արցախի ԱՆ-ն չի հաստատում հղիի մահվան մասին լուրը
Այսօր լրատվամիջոցներում տարածվել է տեղեկատվություն, որ Արցախի Հաթերք գյուղում հղիի մահվան դեպք է գրանցվել։ Panoarama.am-ի հետ զրույցում Արցախի Հանրապետության առողջապահության նախարարությունից չեն հաստատել այդ լուրը։
«Սա նոր դեպք չէ, Հաթերքում տեղի ունեցած դեպքն է, որը տեղի է ունեցել մեկ ամիս առաջ։ Մենք այդ մասին բարձրաձայնել ենք, ոչ թե ծննդկանն է մահացել, այլ պտուղը»,-ասել են ԱՆ խոսնակ Անգելինա Իսախանյանը։
Նշենք, որ երեկ ՀՀ մարդու իրավունքների պաշտպանը հրապարակել էր հայտարարություն, որտեղ մասնավորապես նշված էր.
«Բավարար սննդի բացակայության պայմաններում Լեռնային Ղարաբաղում վաղաժամ ծնունդների դեպքերի աճ է գրանցվել։ Գրանցվել է նաև Մարտակերտի շրջանի Հաթերք գյուղում չծնված երեխայի մահվան դեպք` վառելիքի բացակայությամբ պայմանավորված շտապ օգնության անհասանելիության պատճառով»։
Հիշեցնենք, որ այսօր Մարտակերտի շրջանի Հաթերք գյուղում չծնված երեխայի մահվան դեպքի մասին գրել էր Մանգասարյան Աննա անունով ֆեյսբուքյան օգտատերը և հասարակական-քաղաքական գործիչ Արշակ Աբրահամյանը:
Ավելի ուշ Արշակ Աբրահամյանը հեռացրել էր գրառումը և նոր հայտարարությամբ նշել, որ հղի կնոջ հետ կապված դեպքի մանրամասները ճշտել ինֆորմացիայի սկզբնաղբյուր հանդիսացողներից, ապա տեղադրել է վերոնշյալ օգտատիրոջ էջի հղումը:
