Ֆրանսիայի ներկայացուցիչն Ադրբեջանին կոչ արեց անհապաղ վերականգնել Լաչինի միջանցքով անխոչընդոտ տեղաշարժը
Ֆրանսիայի ներկայացուցիչը Արցախի հարցով ՄԱԿ-ի ԱԽ նիստում նշել է ութամսյա շրջափակման փաստը՝ շեշտելով, որ դրա համար ոչ մի հիմնավոր պատճառ չկա: Այս մասին ասել է ՄԱԿ-ի ԱԽ-ում Ֆրանսիայի մշտական ներկայացուցչի տեղակալ Նատալի Բրոդհերսթը։
«Բնակչության համար կարևոր՝ գյուղաշխատանքների խոչընդոտումը նույնպես հարուցում է խոր անհանգստություն։ Անընդունելի է նաև Կարմիր խաչի գործունեության խոչընդոտումը։ Կոչ ենք անում ապահովել գազի և էլեկտրական էներգիայի մատակարարումը, ինչպես նաև պահպանել միջազգային հեղինակավոր ատյանների կայացրած որոշումների կատարումը»,– ասել է ՄԱԿ ԱԽ նիստում Ֆրանսիայի ներկայացուցիչը։
Ֆրանսիայի ներկայացուցիչը ընդգծել է՝ այդ արգելափակումը մեկուսացրել է ԼՂ բնակչությանը աշխարհից առանց որևէ լեգիտիմ պատճառի։
Իր խոսքով՝ Ֆրանսիան դատապարտում է մարդասիրական օգնության արգելափակումը և Ադրբեջանին կոչ է անում անվերապահորեն և անմիջապես վերականգնել անխոչընդոտ տեղաշարժը երկու ուղղություններով։
