Մակրոնի մարդը ծրագրում է ղեկավարել ԵՄ-ն․ Politico

Եվրոպական հանձնաժողովի ներքին շուկայի հարցերով հանձնակատար Տիերի Բրետոնը, որը, մասնավորապես, պատասխանատու է տնտեսության ռազմականացման և Ուկրաինային արկերի մատակարարման եվրոպական ծրագրի իրականացման համար, մտադիր է Եվրահանձնաժողովի նախագահի պաշտոնում փոխարինել Ուրսուլա ֆոն դեր Լայենին։ Այս մասին գրել է Politico թերթը՝ հղում անելով դիվանագիտական աղբյուրներին։ 

Ֆոն դեր Լայենի պաշտոնավարման առաջին ժամկետը լրանում է 2024 թվականին։

«Այլևս կասկած չկա, որ Բրետոնը ցանկանում է այդ պաշտոնը: Փաստորեն, դա օրեցօր ավելի ու ավելի ակնհայտ է դառնում»,- ասել է Եվրահանձնաժողովի պաշտոնյան, որի անունը չի հրապարակվել։

Ըստ պարբերականի՝ Բրետոնն արդեն ամեն ինչ անում է, որպեսզի իր նշանակումը հաջորդ հնգամյա ժամկետում անխուսափելի լինի։ Ըստ աղբյուրի՝ Բրետոնը Ֆրանսիայի նախագահ Էմանուել Մակրոնի մարդն է։ 

Պարբերականն ընդգծել է, որ Բրետոնի թեկնածությունը կարող է խնդրահարույց դառնալ ԵՄ շատ երկրների համար, որոնք զգուշանում են, թե նա կսկսի առաջ մղել ֆրանսիական շահերը Բրյուսելում։