Կիևի և Արևմուտքի՝ ռուսական ամեն ինչ ոչնչացնելու քաղաքականությունն ապագա չունի. Պուտին

Կիևի և արևմտյան երկրների քաղաքականությունը, որն ուղղված է ռուսական ամեն ինչի ոչնչացմանը, ապագա չունի, վստահ է ՌԴ նախագահ Վլադիմիր Պուտինը։ Այս մասին նա հայտարարել է չորեքշաբթի՝ օգոստոսի 2-ին կառավարության անդամների հետ հանդիպմանը, գրում է ՏԱՍՍ-ը։ 

Քննարկելով երկրի մշակութային տարածության մեջ նոր շրջանների ինտեգրման թեման՝ պետության ղեկավարը նշել է, որ Դոնբասի, Խերսոնի և Զապորոժիեի շրջանների բնակիչները, փաստորեն, չեն լքել այդ տարածքը։ Չնայած Կիևի ռեժիմի բոլոր փորձերին՝ «չեղյալ համարել» ռուսերեն գրքերն ու դասականները, այդ տարածքների բնակչությունը պահպանել է իր մայրենի լեզուն, միշտ մեծ հետաքրքրություն է ցուցաբերել ռուս գրականության, նշանավոր հայրենակիցների ստեղծագործությունների նկատմամբ։

Նախագահն ասել է, որ պահուստային ֆոնդից միջոցներ է հատկացրել նոր մարզերի գրադարանների համար երկուսուկես միլիոն գրքերի հրատարակման համար։ Գրադարանները կմիացվեն նաև էլեկտրոնային հարթակների հետ, որոնք հասանելիություն կապահովեն ռուս գրականության ստեղծագործություններին։

Վլադիմիր Պուտինը հավելել է, որ տպագրության, հրատարակությունների գնման և առաքման աշխատանքները կիրականացվեն Ռուսական գրքի միության հետ։ Նա մատնանշեց, որ դա պետք է արվի մինչև նոր ուսումնական տարի, հնարավորինս արագ, որպեսզի դպրոցականներն ապահովվեն անհրաժեշտ գրքերով և ձեռնարկներով։