Դանիան և Շվեդիան քննարկում են Ղուրանի այրման արգելքը

Դանիայի և Շվեդիայի կառավարությունները քննարկում են, թե ինչպես, առանց խոսքի և կարծիքի ազատության իրենց հիմնարար սկզբունքները խախտելու, արգելել կամ սահմանափակել Ղուրանի և այլ կրոնական տեքստերի հրապարակային այրումը: Նման մի քանի գործողությունները վերջին շրջանում լուրջ խնդիրներ են առաջացրել երկու երկրների համար։ 

Դանիայի արտաքին գործերի նախարար Լարս Լոկկե Ռասմուսենը կիրակի դանիական DR հեռուստաալիքին ասել է, որ կառավարությունը պատրաստվում է օրինական ճանապարհ գտնել մուսուլմանական դեսպանատների առջև Ղուրանի այրումն արգելելու համար։ 

Շվեդիայի վարչապետ Ուլֆ Քրիսթերսոնը սոցիալական ցանցերում հայտարարել է, որ իր կառավարությունը նույնպես ուղիներ է փնտրում նման գործողություններն արգելելու համար, և որ ինքը քննարկում է այդ հարցը դանիացի գործընկեր Մետե Ֆրեդերիկսենի հետ։