Ռուսաստանը աֆրիկյան երկրներին ընդհանուր 23 մլրդ դոլարի պարտք է ներել

ՌԴ նախագահ Վլադիմիր Պուտինը, ելույթ ունենալով Ռուսաստան-Աֆրիկա համաժողովի երկրորդ օրը, ասել է, որ երկրները կապված են բարեկամական սերտ կապերով։ Նա նշել է, որ Մոսկվան աֆրիկյան երկրներին ընդհանուր առմամբ 23 մլրդ դոլարի պարտք է ներել, գրում է kommersant.ru-ն։

Ըստ Պուտինի՝ Մոսկվան մտադիր է շարունակել օգնել աֆրիկյան մայրցամաքի զարգացմանը և մոտ 90 մլն դոլար կհատկացնի աֆրիկյան երկրներին այդ նպատակով:

«Ռուսաստանը մասնակցում է աֆրիկյան երկրների պարտքի բեռը մեղմելու ջանքերին։ Մինչ օրս մեր կողմից ներված ընդհանուր պարտքը կազմում է 23 մլրդ դոլար։ Աֆրիկյան երկրների խնդրանքով մենք ավելի քան 90 միլիոն կհատկացնենք զարգացման նպատակների համար»,- ասել է պետության ղեկավարը։

Նշենք, որ Պետդումայի պատգամավոր Միխայիլ Դելյագինը ավելի վաղ ՌԲԿ-ին ասել էր, որ 1992 թվականից սկսած Ռուսաստանը ներել է մոտ 152 միլիարդ դոլարի պարտք տարբեր երկրներին։ Պաշտոնապես Ռուսաստանի Դաշնության իշխանությունները չեն հաստատել այս տեղեկությունը։