ՏԵՍԱՆՅՈՒԹ․ Բեռնատարներն արդեն 20 ժամ է՝ սպասում է Կոռնիձորի հատվածում, դեռ որևէ տեղաշարժ չկա․ Վարդան Սարգսյան
Հայաստանից Արցախ ուղարկվող 400 տոննա հումանիտար օգնությամբ 19 բեռնատար 20 ժամ է՝ սպասում է Կոռնիձորի հատվածում, դեռ որևէ տեղաշարժ չկա։ Այս մասին այսօր՝ հուլիսի 27-ին, լրագրողների հետ զրույցում նշեց ԼՂ հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը:
«Գործընթացը պահանջում է ըմբռնում, համբերատարություն և քայլերի որոշակի հաջորդականություն։ Դիմել ենք ՌԴ խաղաղապահներին եւ համապատասխան օղակներով՝ Ադրբեջանին, բայց դեռ որևէ պատասխան չենք ստացել։ Կարող ենք ասել՝ քար լռություն է»,- նշեց նա։
Ըստ ԼՂ-ում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանի՝ կապ է հաստատվել ՌԴ խաղաղապահ ուժերի հետ՝ բեռը տեղ հասցնելու հետ կապված:
Իր հերթին Ադրբեջանի պետական սահմանային ծառայությունը հաղորդագրություն է տարածել՝ նշելով.
«Ստացված տեղեկությունների համաձայն՝ հուլիսի 26-ին Հայաստանի կողմից Լաչինի պետական սահմանի անցակետի մուտքի մոտ կազմակերպելով տարբեր մեքենաների կուտակումներ՝ հերթական սադրիչ գործողությունն է ծրագրվում»:
Հիշեցնենք, որ երեկ՝ հուլիսի 26-ին, առաջին անհրաժեշտության սննդամթերքով ու ապրանքներով 19 բեռնատար մեքենաները ուղևորվել են Կոռնիձոր, որտեղից նախատեսվում է ՌԴ խաղաղապահների ուղեկցությամբ 400 տոննա հումանիտար օգնությունը փոխանցել արցախահայությանը։ Մարդասիրական օգնությունը շրջափակված Արցախ է ուղարկվում պետական ծրագրի շրջանակում։
